上一則下一則
Sun奇古怪：Sun潮語：【插 旗】
潮語「插旗」真係唔使點解釋都知係咩意思，「插」者，插入也。「旗」者，旗幟也。「插旗」就係喺人哋嘅地方，插下自己支旗，簡單嚟講，即係佔領。當然你亦可以喺屬於自己嘅地方插旗宣示主權，但「旗」當然插喺人哋度先至有着數。通常大家睇戰爭片，或睇歷史圖片都可以見到「插旗」係一件相當隆重同壯烈嘅事，好似太平洋戰爭，美軍攻克硫磺島之後喺山頂「插旗」，同美國人登月之後都要插旗。中日亦都要喺釣魚島鬥插旗，爭奪主權。
最近有評論文章指出，香港已經唔係香港人嘅城市，仲話呢個城市已經好陌生，完全唔係作者生活了幾十年的城市。其實喺今時今日嘅香港，已經唔止一次聽到呢個老掉牙嘅言論。自從一九九七年主權移交之後，乜你仲相信呢度係屬於香港人嘅咩？喺網上呢幾年嚟，都已經不斷有大陸人高呼香港所有嘢，包括所有外匯儲備，人同錢都係屬於祖國o架啦，所以對於特首及其朋黨所做嘅一切，只係加速呢個「真回歸」嘅工程，等我哋可以同大陸共產政權嗰種具中國特色嘅價值無縫接軌，相當合情合理合法。警察公安化、食環城管化、政治一黨化、政府貪腐化，香港人一直沉默地默許呢一切發生，或者喺今日嘅香港，最緊要係睇化。因為紅色勢力其實一早喺回歸前已經喺香港「插旗」，係你班香港人一直扮睇唔到啫！
時至今日，「插旗」如作潮語用，亦有插手某件事，同「安插勢力」嘅意思。例如喺辦公室，有啲主管會喺人哋嘅部門或隊伍「插旗」，表示將人哋嘅地盤納入自己嘅權力範圍。另外，港式粵語中「旗」亦有男人那話兒嘅意思，如你「插旗」在某異性身上到底有咩含意？只有當事人自己先知。
第一手消息請下載on.cc東方互動iPhone/iPad/Android/Windows Phone Apps